Sunday, 30 June 2013

ತೀರ....


ಈ ತೀರದಲ್ಲೀಗ ಕತ್ತಲು
ನಾನು ಚೆನ್ನಾಗಿದ್ದೇನೆ... 
ಕಾರಣಗಳು ಇಲ್ಲ ಅಂತೇನಿಲ್ಲ 
ಚೆನ್ನಾಗಿಲ್ಲದಿರಲು!

ಕೋಣೆಯಲ್ಲಿ  ಇನ್ನೂ ಸತ್ತು ಮಲಗಿದೆ 
ನಾನೇ ಬಡಿದು ಕೊಂದ ಲಕ್ಷ್ಮಿ ಚೇಳು
ಇನ್ನು ರಾತ್ರಿ ಮಲಗಿದ ಹಾಗೆಯೇ
ಅಮ್ಮ ಚೇಳು ಕಡಿದು 
ಸೇಡು ತೀರಿಸಿಕೊಳ್ಳಬಹುದೇ?

ಇವೆಲ್ಲವನ್ನೂ ಪರಿಗಣಿಸಿದರೆ
ಹೌದು ಚೆನ್ನಾಗಿಲ್ಲ ನಾನು!

ನನ್ನ ಮನದಲ್ಲಿ ನೀರವ ಮೌನ 
ಕಾರಣ ಹುಡುಕುತ್ತಿದ್ದೇನೆ
ಎಲ್ಲೋ ಗಾಡಿ ಓಡುವ ಸದ್ದು 
ಇರುಳಿನಲ್ಲೂ ಧಾವಂತಕ್ಕಿಲ್ಲ ವಿಶ್ರಾಂತಿ

ಈ ವಿಷಯಗಳಲ್ಲ ನಾ ಹೇಳ ಹೊರಟಿದ್ದು 
ಬಿಡು, ಎಲ್ಲವನ್ನೂ ಹೇಳಬೇಕಾದ ಜರೂರತ್ತೇನಿದೆ?
ಹೇಗಿದ್ದೀಯ ನೀನು?
ಆ ತೀರದಲ್ಲಿನ ಸಂಗತಿಗಳೇನು?